ગાંધીચરિત

     'ગાંધીજીનો અક્ષરદેહ' ના સંપાદક અને ઊંડા અભ્યાસી શ્રી ચી. ના. પટેલે લખેલું મહાત્મા ગાંધીજીનું પ્રમાણભૂત અદ્યતન ચરિત્ર છે. તેનાં ૧૫૦ પૃષ્ઠો છે. આ પુસ્તકની ત્રીજી આવૃત્તિ થઈ છે. આ પુસ્તકમાં ગાંધીજીના જુદા જુદા સમયની તસવીરો છે. વળી તેમાં ગાંધી વંશવૃક્ષ પણ મૂકવામાં આવ્યું છે.

કૅન્સર 

    કૅન્સર વિશે અધિકૃત અને તલસ્પર્શી માહિતી આપતા છવ્વીસ જેટલા નિષ્ણાત તબીબોના સહયોગથી તૈયાર થયેલું પુસ્તક. તેનું સંપાદન ડૉ. શિલીન નં. શુક્લએ કર્યું છે. આ પુસ્તકની ચોથી આવૃત્તિ થઈ  છે. કૅન્સર  એટલે શું ? તેની સારવાર અને લગભગ છત્રીસ પ્રકારનાં કૅન્સર  વિશેની સચિત્ર માહિતી આમાં છે. આ પુસ્‍તકની પાછળ તેમાં વપરાયેલી પરિભાષા પણ મૂકવામાં આવી છે. ૩૯૪ પૃષ્ઠમાં આ પુસ્તક વિશે વિસ્‍તૃત માહિતી મળે છે.

નાટક દેશવિદેશમાં

નાટક અને રંગભૂમિ વિશેની સર્વગ્રાહી માહિતી આપતો વીસ તજ્ જ્ઞોના લેખોનો સંચય; જેમાં નાટક, નાટ્યપ્રવૃત્તિ, નાટ્યગૃહો, નાટ્યનિર્માણ, અભિનય, લોકનાટ્ય, રંગકસબ અને નાટકનું ભાવન અને વિવેચન વિશેના સચિત્ર લેખો છે. ૨૬૩ પૃષ્ઠમાં નાટક અને રંગભૂમિ વિશેની માહિતી વાંચવા મળે છે.

ભારત : પ્રતિભા અને પરિદર્શન

     ભારતનાં ઇતિહાસ, ભૂગોળ, સાહિત્ય, કલા, રાજકારણ, ભારતીય સંસ્કાર અને સંસ્કૃતિના સમૃદ્ધ વારસાનું સમગ્ર દર્શન કરાવતા પ્રતિષ્ઠિત તજ્ જ્ઞોના લેખો ધરાવતો ૭૦૦ પૃષ્ઠનો ગ્રંથ છે. શ્વેત-શ્યામ ઉપરાંત અહીં અપાયેલાં અનેક રંગીન ચિત્રો આ ગ્રંથનું આકર્ષણ છે.

સિદ્ધાંતસારનું અવલોકન

     મણિલાલ દ્વિવેદી કૃત ‘સિદ્ધાંતસાર’ વિશેના મણિશંકર રત્નજી ભટ્ટે પત્રો રૂપે કરેલાં અવલોકનોનું ડૉ. ધીરુભાઈ ઠાકરે કરેલું સંપાદન છે.

નાટ્યતાલીમના નેપથ્યે

     નાટ્યકલા અને નાટ્યશિક્ષણ સાથે નિસબત ધરાવનારને આ પુસ્તક ઉપયોગી થાય તેમ છે. ડૉ. ધીરુભાઈ ઠાકરે આ પુસ્તકને બે વિભાગમાં વહેંચી આપ્યું છે. પહેલા ભાગમાં નાટ્યતાલીમની વાત છે તો બીજા ભાગમાં વક્તવ્યો છે. ૧૪૦ પૃષ્ઠમાં સરસ માહિતી મળે છે.
કર્મયોગી સ્વ.સાંકળચંદભાઈ પટેલ જીવનઘડતર ગ્રંથશ્રેણી

ગુજરાતના સ્વાતંત્ર્યસૈનિકો (માહિતીકોશ)

     ગુજરાતના ૧૮૫૭થી ૧૯૪૭ સુધીના ૪૨૧૨ સ્વાતંત્ર્યસૈનિકોની માહિતી ધરાવતો કોશ છે. ૬૦૦ પૃષ્ઠમાં આ ગ્રંથ વહેંચાયેલો છે. અહીં આપેલી માહિતી કક્કાવારી પ્રમાણે ગોઠવી છે. વળી પાછળ જે લોકો જેલમાં જઈ આવેલા છે અને જેમની માહિતી મળતી નથી તેમની યાદી પણ મૂકી છે. યાદી જિલ્લા પ્રમાણે છે. ગુજરાતના સ્વાતંત્ર્યસૈનિકોની તસવીર પણ અહીં મૂકેલ છે. આ પુસ્તકનું સંપાદન ડૉ. જયકુમાર ર. શુકલે કર્યું છે.

ભૂકંપ : માહિતી અને ઘટના

     ભૂકંપનું વિજ્ઞાન, તેનો ઇતિહાસ અને તેનાથી દુનિયા અને ખાસ કરીને ગુજરાતમાં વેરાયેલા વિનાશની રજૂઆત આ પુસ્તકમાં થઈ છે. આ પુસ્તકમાં વિનાશક ભૂકંપની રંગીન તસવીરો મૂકવામાં આવી છે. આ પુસ્તકના લેખક શ્રી જી. બી. પંડ્યા છે.

વિરલ વિભૂતિ વિક્રમ સારાભાઈ

     મહાન વિજ્ઞાની ડૉ. વિક્રમ સારાભાઈના જીવન અને સિદ્ધિઓની રજૂઆત કરતી જીવનકથા. પુસ્તકની પાછળ થોડી તસવીરો ધ્યાન ખેંચે તેવી છે. જેના લેખક પ્રા. પી. સી. પટેલ છે.

મેઘાણીચરિત

     ઝવેરચંદ મેઘાણીના જીવન અને સર્જનનો પરિચય આપતો અભ્યાસગ્રંથ છે. આ પુસ્તકના લેખક શ્રી કનુભાઈ જાની છે.

પ્રવાસી પિરામિડનો

     બ્રાઝિલિયન લેખક પાઉલો કોએલ્હોની નવલકથા ‘ધી એલ્કેમિસ્ટ’નો ડૉ.ધીરુભાઈ ઠાકરે કરેલો સારાનુવાદ

ગુજરાતી રંગભૂમિ :  રિદ્ધિ અને રોનક

     જૂની ગુજરાતી રંગભૂમિનો સિલસિલાબંધ ઇતિહાસ અને તેની ઉપલબ્ધિઓ વિશે સચિત્ર માહિતી આપતા આ દળદાર ગ્રંથનું સંપાદન ડૉ. મહેશ ચોકસી અને શ્રી ધીરેન્દ્ર સોમાણીએ કર્યું છે.

લોકશાહી

     ભારતના સંદર્ભમાં ‘લોકશાહી’ રાજ્યપદ્ધતિનો સૈદ્ધાંતિક અને વ્યવહારલક્ષી પરિચય કરાવતું પુસ્તક. જેના લેખક પ્રા. રક્ષાબહેન વ્યાસ છે. શ્રી ગંભીરચંદ ઉમેદચંદ શાહ વિશ્વવિદ્યાશ્રેણી

જનીનવિજ્ઞાન (Genetics)

     ‘જનીનવિજ્ઞાન’ની બુનિયાદી સમજ માટેનો વૈજ્ઞાનિક અભિગમ ધરાવતું પુસ્તક. આ પુસ્તકના લેખક શ્રી જે. પી. ત્રિવેદી છે. આ પુસ્તકમાં જીવવિજ્ઞાનના સાંપ્રત પ્રવાહોનો આછો નિર્દેશ કરેલ છે.

લોકવિદ્યા-પરિચય

     ગુજરાતના સંદર્ભમાં લોકવિદ્યાનો પરિચય આપતું પુસ્તક. જેના લેખક શ્રી હસુભાઈ યાજ્ઞિક છે. આ પુસ્તકમાં લોકવિદ્યાનાં પાયાનાં મૂળભૂત તત્ત્વોનો પરિચય આપવાનો પ્રયત્ન છે. શ્વેત-શ્યામ અને રંગીન ચિત્રો આ પુસ્તકમાં જોવા મળે છે.

આપણાં રાષ્ટ્રીય પ્રતીકો

     શિક્ષણનું એક પ્રયોજન નવી પેઢીમાં રાષ્ટ્રીય અસ્મિતા પ્રગટ કરવી તે છે. રાષ્ટ્રધ્વજ, રાષ્ટ્રગીત, રાષ્ટ્રીય પક્ષી - આ તમામ અંગોની અધિકૃત માહિતી દ્વારા વાચકને રાષ્ટ્રીય વ્યક્તિત્વ અને સાંસ્કૃતિક પરંપરાનો સમ્યક પરિચય કરાવવાનો છે. એ દષ્ટિએ આપણાં રાષ્ટ્રીય પ્રતીકોનું મહત્ત્વ તથા તેનો ઇતિહાસ દર્શાવતું આ પુસ્તક જેના લેખક પ્રા રક્ષાબહેન વ્યાસ છે.

લિપિ

     લિપિની શોધ માનવસંસ્કૃતિના વિકાસનું એક મોટું સોપાન છે. વિવિધ દેશકાળમાં પ્રચલિત લિપિસ્વરૂપનો સરળ અને શાસ્ત્રીય પરિચય આ પુસ્તકમાં છે. આ પુસ્તકના લેખિકા  શ્રી ભરતીબેન શેલેત છે. લિપિના વિકાસનાં સોપાનો, વર્ગીકરણ, વર્ણમાળાઓની વિશ્વ અને ભારતના સંદર્ભમાં વૈજ્ઞાનિક માહિતી આપતું પ્રકાશન છે.

ભૂમિતિ : સ્વરૂપ અને પ્રકાર :

    ભૂમિતિનાં વિવિધ પાસાંનો પરિચય આપતું આ પુસ્તક છે. આ પુસ્તકના લેખકો શ્રી અરુણભાઈ વૈદ્ય અને શ્રી શિવપ્રસાદ જાની છે. ભૂમિતિ તર્કબદ્ધ વિચાર કરવાની શિસ્ત કેળવવામાં પાયારૂપ ગણાય છે. ગણિતની જાણકારી સુલભ બનાવવામાં પણ ભૂમિતિ અગત્યનો ભાગ ભજવે છે તે આ પુસ્તક દ્વારા જાણી શકાય છે.

તરસ્યા મલકનો મેઘ

      જ્ઞાનપીઠ પારિતોષિકવિજેતા સમર્થ નવલકથાકાર પન્નાલાલ પટેલની પ્રા. મણિલાલ પટેલે લખેલી જીવનકથાનું આ પુસ્તક છે.

શબ્દનું સખ્ય

     ગુજરાતી સાહિત્ય, રંગભૂમિ,વિશ્વકોશ આદિ વિશે ડૉ.ધીરુભાઈ ઠાકરના વિવેચનલેખોનો સંગ્રહ

શહીદ વિનોદ કિનારીવાલા

     સ્વતંત્રતાની લડતમાં જીવનનું બલિદાન આપનાર શહીદ વિનોદ કિનારીવાલાનું ચરિત્ર છે. આ પુસ્તકમાં વીર વિનોદ કિનારીવાલાનું જીવનકાર્ય આલેખાયું છે. જેના લેખક શ્રી બીપીન જેઠાલાલ સાંગણકર છે.

ગુજરાત

     ગુજરાતનાં વિવિધ પાસાંઓ પર૬૬ તજ્ જ્ઞોના અદ્યતન માહિતી આપતા લેખોનો સંચય. જેમાં ભૂગોળ, પર્યાવરણ, ઇતિહાસ, સમાજ, અર્થતંત્ર, શાસનતંત્ર, રાજકીય પક્ષો, શિક્ષણ, વિજ્ઞાન અને ટૅક્નૉલૉજી, ધર્મ અને સંસ્કૃતિ, ગુજરાતી ભાષા અને સાહિત્ય, લલિતકલાઓ, સમૂહ માધ્યમો, રમતગમત અને યુવાપવૃત્તિ જેવા વિષયો ઉપર ૫૬૬ પૃષ્ઠમાં સચિત્ર માહિતી મૂકવામાં આવી છે.

Gujarat

     It’s a compilation of articles contributed by experts of different subjects like geography, environment, history, sociology, economy, administration, politics, education, science and technology, religion and philosophy, Gujarati language and literature, fine arts, mass media, games and sports, youth activities etc. All these subjects pertaining to Gujarat have been covered with precision and authenticity in 587 pages.

હસ્તપ્રતવિજ્ઞાન

લેખક શ્રી ડૉ.જયન્ત પ્રે. ઠાકરે આ પુસ્તકમાં હસ્તપ્રત વિશેની ભૂમિકા રજૂ કરીને પ્રાચીન ભારતીય લિપિઓ, પ્રાચીન ભારતીય લેખનસામગ્રી, લહિયાઓ, હસ્તપ્રતો, ભ્રષ્ટ પાઠોની સમીક્ષા તેમજ સમીક્ષિત આવૃત્તિઓની સમસ્યાઓ અંગે અતિ મહત્ત્વપૂર્ણ માર્ગદર્શન રજૂ કર્યું છે.

વિશ્વકોશવિમર્શ

     વિવિધ ભાષાઓમાં વિશ્વકોશની રચના તેમજ સ્વરૂપ, પ્રકાર અને સામગ્રી વિશેના નિષ્ણાતોના અભિગમો અને તેની ગતિવિધિનો સ્પષ્ટ ખ્યાલ આપતું પ્રકાશન. જેનું સંપાદન શ્રી પ્રીતિ શાહે કર્યું છે.

જતીન્‍દ્ર-વિશેષ

     ગુજરાતી વિશ્વકોશના શુભેચ્છકમિત્ર શ્રી જતીન્‍દ્ર આચાર્યે શ્રી અરવિંદના મહાકાવ્‍ય સાવિત્રીનું હાર્દ રજૂ કરતા અંશોનું ગુજરાતી ભાષાંતર તથા એમનું અન્‍ય સાહિત્‍ય

અભિનેય નાટકો

     ૩૬૦ ગુજરાતી નાટકોની રંગસૂચિ. તેમાં નાટકનું નામ, અંકસંખ્‍યા, દ્દશ્યો, પાત્રસંખ્‍યા તેમજ નાટકની રજૂઆત અંગેની વિગતો આપેલી છે. આ પુસ્તકના લેખક ડૉ. ધીરુભાઈ ઠાકર છે.

તળની બોલી

     ઉત્તર ગુજરાતમાં આવેલ દૉતોર પરગણું અને તેની આજુ બાજુના વિસ્‍તારની જાતિ અને તેના હુન્‍નર, સાધનોની વિગત, પ્રચલિત કહેવતો, રૂઢિપ્રયોગો તેમજ શબ્‍દાવલી અહીં સંશોધન રૂપે આલેખાયાં છે. શ્રીદલપત ચૌહાણ તેના લેખક છે.

રેલવેની વિકાસગાથા

     આ પુસ્‍તકમાં રેલવે, એન્જિનો, કોચ, વૅગનો, અન્‍ય સાધનસામગ્રી ઉપરાંત વિશ્વની રેલવેનો અને વિશેષ કરીને ભારતની રેલવેનો તથા ગુજરાતની રેલવેનો વિકાસી આલેખાયો છે. રેલમાર્ગોની કેટલીક જાણવાલાયક રસપ્રદ માહિતી પણ અહીં આપવામાં આવી છે આ પુસ્તકના લેખક જિગીશ દેરાસરી છે.

ગુજરાતી ગ્રંથસૂચિ(૨૦૦૬)

     ગુજરાતી ભાષામાં પ્રકાશિત થયેલા ૧૧૬૮ જેટલાં પુસ્‍તકોની યાદી મૂકી છે. આ સૂચિને કર્તાસૂચિ, ગ્રંથનામસૂચિ, અને વિષયસૂચી પ્રમાણે વર્ગીકરણ કરીને ગોઠવી છે. આ પુસ્તકના લેખક ડૉ. આબેદા કાજી છે.

ગુજરાતી ગ્રંથસૂચિ (૨૦૦૭)

     ૨૦૦૭ના વર્ષમાંપ્રકાશિત થયેલાં ૮૬૧ જેટલાં પુસ્‍તકોની સૂચિ, આ સૂચિને ૧૪ વિષયોમાં વર્ગીકૃત કરી છે. કર્તાસૂચિ, ગ્રંથ નામ સૂચિ અને વિષયસૂચિ પણ આપી છે. ઉપરાંત ૧૩૬ જેટલાં પુસ્‍તકો બાળસાહિત્‍યની સૂચિમાં મૂક્યાં છે.

જાંબુડિયા રંગનું ફૂલ અને બીજાં

     મહેન્‍દ્ર અમીને આ નાટકોનો અનુવાદ કર્યો છે. આ પુસ્‍તકમાં લુઇજી, પિરાન્‍દેલો એન્તૉન, ચેખૉવ, વિલિયમ્‍સ સારોયાન, પૉલ ઓબરમૅન અને ફર્નાન્‍દો અરાબલ જેવા નાટ્યકારોનાં નાટકોનાં ગુજરાતી ભાષાંતરો – રૂપાંતરો છે.

ડાયનોસૉર

     આ પુસ્‍તકમાં પૃથ્‍વીના પટ પર અતીતમાં થઈ ગયેલા વિશાળકાય સરીસૃપોના સમૂહ ‘ડાયનોસૉર‘ની વિસ્‍તૃત માહિતી આપી છે. ડાયનોસૉરના ઉદયથી શરૂકરીને તેની ઉત્‍ક્રાંતિ, તેના વિવિધ પ્રકારો, તેના જીવાવશેષના પુરાવા અને તેની જાળવણી વિશેની માહિતી પણ અહીં વાંચવા મળે છે.  આ પુસ્તકના લેખક પ્રવીણસાગર સત્યપંથી છે.